Аусқәа мҩаҧыргоит Аҟәа ақалақь иатәу «Аиқәыршәазаара» аусуҩцәа Аҧсны аихамҩа аусбарҭа ацхыраарала. Беслан Ешбеи Автандил Сурманиӡеи инеины ирбеит аусурақәа шымҩаҧысуа.

Аҟәа ақалақь ахадара ахарџь ала аиҭашьақәыргыларатә усурақәа мҩаҧысуеит ажәиҧшьтәи абжьаратә школ аҿы. Иҧсахуп аҵараиурҭа ахыб. Убас иҟалеит, аусурақәа рхыркәшара хымш шагыз иҟалаз ақәоура иахҟьаны ахыб ахьырымҧсахыз ҧшь-уадак аӡы рыҩналеит. Аҟәа ахадара ахахьы иагеит урҭ аклассқәа реиҭашьықәыргылара. Иара убас еиҭашьақәыргылахоит аҧсуа бызшәа акабинет.

Акапиталтә еиҭашьақәыргылара мҩаҧысуеит ашкол иатәу аспортзал аҿы. Ара иҧсахуп адашьма инаркны афымца мҩангага ацәаҳәақәа рҟынӡа. Иаваргылоуп иҿыцны ҩ-ҽыҧсахырҭак. Аусурақәа рынагӡаразы маҷк ауп иаанхаз. Ашкол адиректор Рита Бениа излалҳәаз ала, аспортзал аус аулоит ахәылбыҽхагьы, азыҟаҵаҩцәеи аҿари рҟынтә иҟоуп агәазыҳәара еиуеҧшым аспорт хкқәа ргәыҧқәа раартразы.

Анаҩс Аҟәа ахада Беслан Ешба днеины ибеит аӡиас Басла ахьымҩасуа аҟәара арӷәӷәаразы имҩаҧгаз аусурақәа. Аӡиас ааигәа инхо ауааҧсыра амшцәгьақәа раан аӡхыҵра иамыргәаҟларц азы абар хышықәсоуп Аҟәа ахадара имҩаҧыргоижьҭеи арыцқьарақәа. Беслан Ешба идҵала еиҭашьақәыргылахоит ацҳа шкәакәа ахаҿра.

Аҟәатәи ашьхаҿы Аҟәа ахадара мҽхакы ҭбаалатәи аиҭашьақәыргыларақәа мҩаҧнагеит. Хыхьтәи аҧшырҭатә дәаҿы иқәҵоуп аплитка. Уи иаҿықә амҩа абетон ықәырҭәахоит. Иара убас аиҭашьақәыргылара иаҿуп аӡыршә.

Аҟәа ахадара ахарџь ала имҩаҧысуеит аиҭашьақәыргыларақәа Ақалақьтә клиникатә хәышәтәырҭаҿы. Ара иҧсаххоит ахыбра, еиуеиҧшым аҟәшақәа рҿы аиҭашьақәыргыларақәа ргәы иҭоуп. Уажәы ахыркәшарахь инагоуп адкыларҭа ауадақәа рҿы аусурақәа, нап аркуп арентген-уада. Аҟәа ахада иазгәеиҭеит аусурақәа ртемп шыбзиоу, убасгьы ишаццатәу ҧхьаҟа.

Аиааира апроспект аӡиас Аӡаҧшь ахьымҩасуа ацҳа инаркны Алашарбага аҳабла аганахь иахьцо аҟынӡа иқәырҭәоуп абетон, уа инхо ауааҧсыра иҟарҵаз аҳәарала. Урҭ изларҳәаз ала, ҩажәижәаба шықәса раахыс рымҩа аҟаҵара аӡәгьы дахамӡгылацызт, Беслан Ешба дрыцхраауеит ҳәа изықәиргәыӷыз иажәа наигӡеит. Аҟәа ақалақь ахадара амҩа аиҭашьақәыргылара жә-миллион мааҭ инарзынаҧшуа иахҭыннаҵеит.

Арӡынба ихьӡ зху амҩа Агәымааи Титовеи амҩеихдақәа иахьрыбжьаку акаҭран ықәдырҭәоит иаарласны. Уажәазы уа абордиурқәа рықәыргыларазы аусмҩаҧгатәқәа ирҿуп.